ក្រសួងទេសចរណ៍បន្តកិច្ចសហការជាមួយក្រុមហ៊ុន Wilmar CLV ដើម្បីជំរុញការបើកវគ្គបណ្តុះបណ្តាលឥតគិតថ្លៃលើជំនាញដុតនំ (Bakery) សម្រាប់ឆ្នាំ២០២៦!
រាជធានីភ្នំពេញ៖ នាព្រឹកថ្ងៃទី១៩ ខែធ្នូ ឆ្នាំ២០២៥ លោក ជួប រតនា ប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានដឹកនាំមន្ត្រីជំនាញនៃនាយកដ្ឋាន ចូលរួមក្នុងជំនួបពិភាក្សាការងារជាមួយតំណាងក្រុមហ៊ុន Wilmar CLV ដើម្បីជំរុញកិច្ចសហការរៀបចំបើកវគ្គបណ្តុះបណ្តាលឥតគិតថ្លៃលើជំនាញដុតនំ (Bakery) ជូនដល់យុវជនកម្ពុជាចំនួន ១២០រូប ចាប់ពីខែមករា ឆ្នាំ២០២៦ តទៅ។
ក្នុងវគ្គបណ្តុះបណ្តាលនេះ សិក្ខាកាមនឹងត្រូវសិក្សាទាំងទ្រឹស្តី និងការអនុវត្តផ្ទាល់សរុបចំនួន ៧២ម៉ោង លើរបៀបធ្វើនំចំនួន ២០មុខ នៅមជ្ឈមណ្ឌលឧត្តមភាពអាហារម៉ីសាន (Meisan Excellence Center) រាជធានីភ្នំពេញ។
គួរបញ្ជាក់ផងដែរថា កន្លងមកក្រសួងទេសចរណ៍ និងក្រុមហ៊ុន Wilmar CLV បានសហការបើកវគ្គបណ្តុះបណ្តាលជំនាញដុតនំនេះបានចំនួន ៧ ជំនាន់រួចមកហើយ ដោយមានសិក្ខាកាមបញ្ចប់ការសិក្សាដោយជោគជ័យសរុបចំនួន ១៩៨នាក់។
