កិច្ចប្រជុំបច្ចេកទេសរវាងក្រសួងទេសចរណ៍ និងអង្គការស្វីសខន់ថាក់ ដើម្បីពិនិត្យមើលផែនការសកម្មភាពរៀបចំកម្មវិធីបដិសណ្ឋារកិច្ចកម្ពុជាបៃតង (Green HoKa)!
រាជធានីភ្នំពេញ៖ នៅថ្ងៃទី១៨ ខែធ្នូ ឆ្នាំ២០២៥ ឯកឧត្តម ហួត រិទ្ធី អគ្គលេខាធិការរងគណៈកម្មាធិការជាតិវាយតម្លៃទីក្រុងស្អាត និងលោក ចឹក គារុណ អនុប្រធាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ បានចូលរួមក្នុងកិច្ចប្រជុំកម្រិតបច្ចេកទេសជាមួយមន្ត្រីជំនាញរបស់អង្គការ ស្វីសខន់ថាក់ ក្រោមការសម្របសម្រួលពីលេខាធិការដ្ឋានគណៈកម្មាធិការជាតិអ្នកជំនាញទេសចរណ៍ (គ.ជ.អ.ទ.)។
កិច្ចប្រជុំនេះមានគោលបំណងពិភាក្សាលើផែនការសកម្មភាព និងថវិកា សម្រាប់ការរៀបចំកម្មវិធីបដិសណ្ឋារកិច្ចកម្ពុជាបៃតង (Green HoKa) សម្រាប់ឆ្នាំ២០២៦–២០២៧ ដើម្បីធានាឱ្យមានប្រសិទ្ធភាព និងចីរភាព ក្នុងការអភិវឌ្ឍវិស័យបដិសណ្ឋារកិច្ច និងទេសចរណ៍នៅកម្ពុជា។
គួរបញ្ជាក់ផងដែរថា កម្មវិធីបដិសណ្ឋារកិច្ចកម្ពុជាបៃតង (Green HoKa) ត្រូវបានរៀបចំឡើង ដើម្បីចូលរួមចំណែកលើកកម្ពស់ការយល់ដឹងអំពីគំនិតបៃតង តាមរយៈការអភិវឌ្ឍឯកសារបណ្តុះបណ្តាល គោលការណ៍ណែនាំ និងលក្ខណៈវិនិច្ឆ័យដែលសមស្រប ស្របតាមក្របខ័ណ្ឌស្តង់ដាសណ្ឋាគារបៃតងរបស់កម្ពុជា និងស្តង់ដាសណ្ឋាគារបៃតងអាស៊ាន ជាពិសេសសម្រាប់សហគ្រាសខ្នាតតូច និងមធ្យម នៅក្នុងខេត្តគោលដៅ។
កម្មវិធី HoKa បៃតង ផ្តោតលើការអនុវត្តជាក់ស្តែងប្រកបដោយនិរន្តរភាព និងប្រសិទ្ធភាពខ្ពស់ រួមមានយុទ្ធសាស្ត្រកាត់បន្ថយកាកសំណល់អាហារ ការកាត់បន្ថយការប្រើប្រាស់ប្លាស្ទិក ការគ្រប់គ្រងថាមពល និងការបង្កើតបរិយាកាសការងារប្រកបដោយសុវត្ថិភាព។
