ដោយមានការអនុញ្ញាតដ៏ខ្ពង់ខ្ពស់ពី ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ នាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ និងជាលេខាធិការដ្ឋានគណៈកម្មាធិការជាតិអ្នកជំនាញទេសចរណ៍ បានចាត់តាំងមន្រ្តីជំនាញចំនួន ៣ រូប ចុះត្រួតពិនិត្យគុណភាពបណ្តុះបណ្តាល និងដំណើរការធ្វើតេស្តសមត្ថភាពបញ្ចប់ការសិក្សាថ្នាក់សញ្ញាបត្របច្ចេកទេស និងវិជ្ជាជីវៈ ៣ ជំនាន់ទី ៧ ឆ្នាំសិក្សា ២០២៤-២០២៥ ដែលប្រព្រឹត្តទៅនៅថ្ងៃទី ២៥-២៦ ខែធ្នូ ឆ្នាំ ២០២៥ នៅសាលាទេសចរណ៍ និងបដិសណ្ឋារកិច្ច វីត រាជធានីភ្នំពេញ។ សិស្សដែលត្រូវចូលរួមប្រឡងមានចំនួន ២៥ រូប លើជំនាញ៖ គេហកិច្ច ៦ រូប, សេវាកម្មម្ហូបអាហារ និងភេសជ្ជៈ ៩ រូប និងការិយាល័យជួរមុខ ១០ រូប ដោយឆ្លងកាត់វិញ្ញាសាសរសេរ វិញ្ញាសាផ្ទាល់មាត់ និងវិញ្ញាសាអនុវត្ត។
គួរបញ្ជាក់ផងដែរថា ក្នុងវគ្គបណ្តុះបណ្តាលនេះ សាលាបានផ្តល់អាហារូបករណ៍ដល់សិស្សចំនួន ៥០% ដែលតម្រូវឱ្យសិក្សាទ្រឹស្ដីរយៈពេល ៦ ខែ អមដោយការចុះកម្មសិក្សារយៈពេល ៣ ខែ (ហ្វឹកហាត់ការងារ) នៅតាមបណ្តាសណ្ឋាគារដៃគូក្នុងរាជធានីភ្នំពេញ ព្រមទាំងទទួលបាននូវប្រាក់ឧបត្ថម្ភលើកទឹកចិត្តសមរម្យ។ ក្រោយបញ្ចប់វគ្គបណ្តុះបណ្តាល សិស្សទាំងអស់ទទួលបានឱកាសការងារស្ទើរតែ ១០០% ក្នុងនោះរួមមាន៖ ការក្លាយជាបុគ្គលិកពេញសិទ្ធិនៅសណ្ឋាគារដែលខ្លួនបានចុះកម្មសិក្សា ការបើកអាជីវកម្មផ្ទាល់ខ្លួន (ហាងកាហ្វេ) និងមួយចំនួនទៀតទទួលបានអាហាររូបករណ៍ទៅបន្តការសិក្សានៅប្រទេសចិន។
គិតត្រឹមឆ្នាំ ២០២៥ សាលាទេសចរណ៍ និងបដិសណ្ឋារកិច្ច វីត បានបណ្តុះបណ្តាលសិស្សថ្នាក់សញ្ញាបត្របច្ចេកទេស និងវិជ្ជាជីវៈ ៣ បានចំនួន ២៧២ រូប លើជំនាញគេហកិច្ច ជំនាញសេវាកម្មម្ហូបអាហារ និងភេសជ្ជៈ និងជំនាញការិយាល័យជួរមុខ។
